Er det første gang paret legg egg og dei i tillegg er unge, er sjansane større for at dei skal ete opp egga sine. Dette kan ein ikkje vite før ein har prøvd. Om det skulle vise seg at dei et opp egga, tek det ikkje meir enn ca. fjorten dagar til tre veker før dei legg egg på nytt. Andre gongen vil dei som regel legge mange fleire egg.  Går det bra denne gongen, taper en ikkje noko på det. Eggmengda kan variere frå tohundre til tusen. Foreldra vil sørge for at egga får tilført friskt og oksygenrikt vatn til ei kvar tid. Dette gjer dei ved å vifte med brystfinnane sine over egga. Dei passar nøye på å reingjere egga med munnen og fjerne skit og smuss.

Egga vert klekt etter ca. to døgn og yngelen sym med små buktande rørsler etter fire døgn. Etter seks døgn sym dei med brukbar kontroll og ser ut som annan yngel. Foreldra gjer alt dei kan for å halde yngelen samla og snappar opp dei som måtte kome på avvegar med kjeften og spyttar dei inn i stimen igjen. Etterkvart som yngelen vert meir og meir aktive vert det ei ganske håplaus oppgåve. Paret treng mest mogleg ro under egglegging og oppfostring av yngelen.
 

Hjå enkelte par kan dei buktande rørslene til yngelen vere det som gjer at foreldreinstinktet vert svakare enn jaktinstinktet. Då må ein passe på å fjerne yngelen på eit tidlegare stadie neste gong dei legg egg, eller klekke egga på kunstig vis. Det er no likevel eit fint syn å sjå at foreldra tek seg av avkommet sitt, for dei som måtte ha glede av det. Då passar dei på yngelen når dei er ute på symjetur og legg dei i ei klynge på t.d. eit blad når kvelden kjem.

Det kan vere gunstig å ha ei svak lyskjelde i nærleiken av akvariet slik at det ikkje er heilt mørkt i det om natta etter at yngelen er klekt. Då er det lettare for foreldra å finne igjen yngel som måtte ha kome seg ut av nattleie og er i ferd med å havne nede på botnen. Om yngelen havnar på botnen kan dei vikle seg fast inne i grusen, rive seg opp eller døy av surstoffmangel. Uansett så må anten yngel eller foreldre fjernast etter fjorten dagar ,for då er det stor sjanse for at foreldra vil legge egg på nytt og då kan dei oppfatte sine eigne yngel som ein fare og gå til angrep og ete dei opp.