Haldningsskaping i forhold til miljøvern er altså svært sentrale poeng med dette prosjektet. 
Å delta i arbeidet på Ytste Skotet kan dessutan bere fleire slags frukter. 
 

Naturalhushaldet har til dømes ein fysisk og ein sosial faktor som ikkje er nemnd. 
Det er snakk om å arbeide i eit fellesskap, i stor del med kroppen som reiskap, ei arbeidsform som er framand  for svært mange born i dag. Her kjem kontakten mellom barn og vaksne inn, og dessutan kontakten med sin eigen kropp. 
Alt i alt sit vi med eit tverrfagleg tilbod som med skulen sin termar inneheld både kroppsøving, historie, samfunnsfag, naturfag, forming, og gjerne norsk og musikk. 
Sjølv om vi har med "gruppearbeid" å gjere, vil fleire av arbeidsoppgåvene også gi store utfordringar når det gjeld skapande evne og sjølvstendig arbeid. 
 

Kvifor born?  

Miljøspørsmålet kan aldri gøymast vekk, aller minst for komande slekter. 
Er det noko borna bør og må ha ei medviten haldning til, så er det miljøet. 
Borna er og vil vere ei sentral målgruppe for større miljøforståing. 
Born veks opp med fleire og fleire medier, med mindre og mindre direkte forhold til det dei omgir seg med. 
Ytste Skotet skal vere eit ledd i arbeidet for å skape ei heilskapleg forståing og ei kjensle for naturen. 
Her er ressurs-snakk meir enn papirinnsamling ein gong i halvåret, og naturen meir enn ein leikeplass med friluft. 
Med born si innlevingsevne kan formidlinga dessutan bli noko meir enn belæring. 
 

Kvifor Ytste Skotet?  

Ytste Skotet har eit unikt miljø med tanke på bygningar, natur- og kulturlandskap. 
Garden er upåverka av det moderne jordbruket, og har grobotn for å halde fram etter prinsippa frå naturalhushaldet. 
Her kan heilskapen i naturen sin rytme og syklus opplevast i ein kulturell samanhang. 

Over fjorden er eit lettvint steg tilbake i tid. 
Ei ny verd openberrar seg frå du stig i land i fjøresteinane. 
Ytste Skotet er nært og fjernt, verkeleg og visjonært, notid og fortid. 
For borna i dei seks kommunane er Ytste Skotet lokalhistorie på nært hald. 
Plassen er bortgøymd, men ikkje bortgløymd. 
Ytste Skotet er ingenmanns- og allemannseige på Sunnmøre, eit godt utgangspunkt for brei bruk av garden. 
Den kollektive fristaden har ingen eigarinteresser som kan hindre sunnmøringen i å identifisere seg med han. 
Her finst den sunnmørske naturen i rikt monn: fjord og fjell. 

Ytste Skotet er dessutan eit umissande bilde på ei historie med røter heilt tilbake til vikingetida, og med forgreiningar som endar på staden kvil i 1954. 
For illustrasjonen sin del bør Ytste Skotet såleis også haldast i hevd. 
Mykje av arbeidet er allereie gjort. 
Etter at Storfjordens Venner fekk garden i gåve av dei siste brukarane, har foreninga sørga for å ta vare på bygningsmassa og til dels kulturlandskapet. 
Ein skjøtselsplan for området ligg klar til å nyttast på resten. 
Delar av dette praktiske arbeidet kan med fordel leggast inn i samanhang med eit opphald på garden. 

Kan Ytste Skotet og skular, lag og organisasjonar samarbeide, vil det såleis vere til stor verdi for lokalsamfunnet, både når det gjeld å eige historiske skattar og sjølvkjensle.