Det finst utruleg mange måtar å lage knivskaft på. Derfor vil eg berre ta føre meg nokre få av hovudprinsippa.

Skaftforma
Utforminga av sjølve skaftet skjer ved hjelp av rasp, fil, kniv eller ei slipelist som er laga ved at sandpapir vert limt på ei trelist med dobbeltsidig tape. Dette kan vere eit ok tips dersom sløydsalen er som vår; nesten utan brukbart verktøy. Det er viktig at skaftet har ei form som gjer at det sit høveleg fast i slira. Sjå kapittelet om slira.
Etter at skaftet er grovforma, skjer vidare utforming ved hjelp av sandpapir og våtslipepapir. Eg startar med nr 80 og endar opp med nr 600, av og til 1200. Mellom kvar pussing skal emnet fuktast med vatn og tørkast (vannbeising). Ikkje bruk for mykje vatn så emnet blir vått, då går det lenge før det tørkar Når du har fått ei silkeglatt overflate er skaftet ferdig til eventuell farging. Du kan sjekke overflata ved å halde emnet opp mot lyset og dreie det langsomt rundt lengdeaksen. Då vil sjølv usynlege småfeil dukke opp i skuggekanten.
 
        "Som ein feit ørret"