Kniven som slirelest
Slirelesten er etter gammal tradisjon eit utskore trestykke som har
same skaftform som kniven og same form som slira innvendig. Slirelesten
brukast til å sy slira på og skal sitje på plass under
tørkinga. Då får slira etter kvart form etter lesten.Ein
annan metode er å bruke kniven som slirelest. Då får
vi ei meir nøyaktig tilpassing av slira. 
Vått lær avgir litt garvesyre, og denne syra får
knivstålet til å ruste nokså fort.Det er difor viktig
å beskytte kniven under tørkinga. Det kan gjerast på
fleire måtar. Du kan bruke elektrotape og legge den i spiral rundt
kniven så langt som slira går. Pass på at tapen dekkjer
heilt. Det er ein fordel å stryke på litt lærfett på
bladet, men då blir tapen litt vanskeleg å feste i starten.
Ein annan metode er å dekkje kniven med plastfolie. Pass då
på at du brukar fleire lag, slik at bladet ikkje så lett går
igjennom folien. Du kan óg med fordel klippe til ein bit av ein
melkekartong så den passar til bladet. Fest biten til knivbladet
med tape og stikk så kniven i slira. På denne måten får
den ferdige slira ei litt fyldigare form. Når knivslira tørkar,
krympar den og kniven vil sitje heilt fast dersom vi ikkje tek forholdsreglar.
Det kan faktisk hende at du ikkje får kniven ut av slira. Då
er det lurt å bruke blokkreim, som er ei remse av plast (0,5
- 1 mm tjukk) som skal sitje i slira under tørkinga. Tynn ut reima
ut mot sidene så det ikkje blir laga skjemmande kantar i den ferdige
slira. Reima kan dragast ut med tang før du tar ut kniven etter
at slira er tørr.
Blokkreim Teikning: Knut Dahl