http://www.globalskolen.no
Grunnskulen på Internett

Prosjekt for fjernundervisning av norske grunnskuleelevar i utlandet og elevar ved små utkantskular.
Rapport for perioda 1. august 2001 - 31. desember 2001

INNHALD

Leiing
Nettlærarar og vertsklasser
Evaluering
Samarbeidspartar
Elevar
Tildelte ressursar
Foreldrerettleiing i småskulen
Rettleiing av nettlærarane
Administrasjon
Andrelærarfunksjonen
Nettbasert læringsmiljø
Tekniske utfordringar
Ressurssidene
Vertsklassene
Foreldrevurdering
Elevar i Norge
Lærebokuavhengig nettundervisning
Media
Økonomi
Rapportar frå nettlærarane
Skuleåret 2002/2003
Konklusjon

Vedlegg:
Statistikk frå foreldrevurdering av læringsarenaene i Globalskolen hausten 2001.

Ståle Ytrestøl, AV-senteret, leiar i Norsk nettskole
Helge Standal, AV-senteret, administrativ leiar i Globalskolen
Arne Heimestøl, AV-senteret, pedagogisk leiar i Globalskolen.

2. klasse: Marit Gjørsvik, Øye skule, Surnadal (minimal bruk av vertsklasse)
3. klasse: Grete Hoel, Fjørå skule, Nordal
4. klasse: Elisabeth Brummenæs, Grøne Bråden skole, Egersund.
5. klasse: Lars Fivelstad, Sunnylven skule, Hellesylt
6. klasse: Sverre Leivdal, Sunnylven skule, Hellesylt. Droppa vertsklasse frå oktober.
7. klasse: Stig Morten Gjørsvik, Øye skule, Surnadal.
8. klasse: Julie Bjørnstad (utan vertsklasse)
9. klasse: Arne Heimestøl, Hedalen barne- og ungdomsskole, Hedalen i Valdres.
10. klasse: Bernt-Are Wiik, Skarbøvik ungdomsskole, Ålesund (liten bruk av vertsklasse)
10. klasse, matematikk: Liv Berit Berge, Hyllestad. (uten bruk av vertsklasse)

Andrelærarar:
5. klasse: Sverre Leivdal, også nettlærar i 6. klasse.
9. klasse: Per Rødøy, Skjervøy skole, Yttervåg i Sør-Trøndelag

Prosjektet har berre hatt skolebasert vurdering dette halvåret gjennom lærarrapportane og foreldrekonferansane. Resultatet er oppsummeringa og vurderinga i denne halvårsrapporten.

I tillegg til vertsskular i Stranda, Norddal, Surnadal, Egersund og Sør-Aurdal kommune har prosjektet hatt samarbeid med desse instansane:

• Læringssenteret. 2 delprosjekt med utvikling av elektroniske læremiddel.
• Høgskulen i Volda. Oppstart av praksisprosjekt i norskfaget i 9. klasse.
• Utdanningsforbundet. Samarbeid om arbeidsvilkår for nettlærarar.
• IBAN Interesseorganisasjon for barn av nordmenn i utlandet. Gjensidig utveksling av informasjon.
• INKAS. Internasjonalt nettverk og kompetanse. Rådgivingsgruppe med internasjonalisering av næringslivet som mål. Gjensidig utveksling av informasjon.
• LUFS. Landslaget for udelte og fådelte skular. Artikkel i medlemsblad.
• Misjonsorganisasjonar og Norsk lærerakademi.
• Utenriksdepartementet. Informasjonsspreiing i departementet sine organ.
• Statoil. Utveksling av informasjon.

Hausten 2001 har Globalskolen på det meste hatt 180 nettelevar. Dei har hatt opphald i ca 50 ulike land. Viser til skulekartet. I foreldrekonferansane kom det fram at gjennomsnittseleven i Globalskolen arbeider 4 timer i veka med nettskulearbeid, det er ein auke på 30 minutt frå våren 2001.
13 nettelevar bur i Norge. Dette er elevar ved nedleggingstrua utkantskular eller elevar som er tekne inn på særskilt grunnlag.

Tildelte ressurssar:

Driftsmidlar Norsk nettskole hausten 2000: KUF ref: 01/6238 av 11.10.01: 2 000 000,- som skal dekke underskot på 150 000 for vårhalvåret 2001 og heile skuleåret 2001/2002.

Foreldrerettleiing i småskulen, 2. klasse

Vi var spesielt spente på det nye 2. klassetrinnet med 6 aktive og ca 4 mindre aktive elevar. I andre klasse har vekeplanane vore lagt opp slik at det heile har fungert som foreldrerettleiing. Elevane har ulike føresetnadar for å lese og forstå mykje tekst. Dette har fungert bra, sjølv om det fører til at vekeplanane blir veldig omstendelege. Kontakt med foreldra har vi kvar veke, dei må skrive til nettlærar for å fortelje korleis arbeidet kvar veke har fungert. Foreldra har tatt oppgava som "støttelærar" på strak arm. Opplegget hadde kanskje ikke vore mulig uten den støtta og det tette samarbeidet. Elevane på dette nivået har ikkje behov for vertsklasse. Klassen brukar ikkje lærebok i samfunnsfag. Vi har sendt ut ein CD med bokstavleker til elevane i 2. klassetrinn. I noen ukeplaner har oppgavene vært knyttet til CDen.
For 3. og 4. klasse (dels også i 5. klasse) har alle vekeplanar hatt eigne avsnitt med informasjon til foreldra.

Rettleiing av nettlærarane

Vi har erfart at det er nyttig at heile kollegiet møtes to gongar i året. Det bør vere todagars samlingar. Kostnadar til dette er så pass store at vi av den grunn bør vurdere geografisk plassering av eventuelle nye nettlærarar. Elles har alle nettlærarane i halvårsrapportane vurdert rettleiinga frå prosjektleiinga som god.

Administrasjon

På- og avmelding av elevar tek ein god del av administrasjonsressursen til prosjektleiinga. FirstClass programmet har ikkje effektivisert dette arbeidet. Fråfallet av elevar som er påmelde er på 10-15%. Det er relativt lite når vi tenkjer på at mange familiar i utlandet får heilt andre rammevilkår enn det dei ventar ved avreise frå Norge. Innkrevjing av skulepengar er relativt tregt og tungvint, eit byråkratisk ledd som bør unngåast. Elles går det stadig mykje tid til telefonisk informasjon til nye søkjarar.

Både foreldre, nettlærarar og utvikling av nettbasert grunnskuleundervisning generelt lir under mangel på departementale retningslinjer.

Administrasjonen har trong for datateknisk kompetanse i tillegg til ordinær kompetanse på skuleleiing. Vi ynskjer å halde fram med leiingsstrukturen også etter at (dersom) Globalskolen vert ein formelt godkjend skule.

Andrelærarfunksjonen

Deling av av elevar i same klasse på to lærarar har fungert så greit dette halvåret. Dette skjer i berre to klassetrinn, og det er eit godt samarbeid mellom nettlærarar og andrelærarar.

Vi har i dette skuleåret tatt i bruk intranettet FirstClass som den viktigaste delen av læringsmiljøet, men har elles halde fram med nettsidestrukturen som vart nytta i åpne nettsider vårhalvåret 2001. Her er eit oversyn over læringsmiljøet:

http://www.norsknettskole.no/globalskolen/informasjon/gsmodell.htm

Tekniske utfordringar

Det ser ut som det er få elevar som har vesentlege tekniske vanskar etter at dei har etablert kontakt med innlogg i Globalskolen. Men utfordringa for mange foreldre har vore å installere FirstClass rett. Sjå vedlegg om dette.

Her er nokre moment som er viktige:

• Inngangsterskelen i fjernundervisninga er litt for stor etter at vi tok i bruk FirstClass. Mellom 5 og 10 søkarar har enten slutta eller basert seg på vekeplansamarbeid utanom FirstClass fordi dei ikkje fikk til å installere programmet.
• Intranettet i FirstClass fungerer godt med omsyn til passordvern på individ- og gruppenivå.
• E-post systemet i FirstClass vert kritisert både av elevar og nettlærarar. ("Trådsystemet" er ikkje intuitivt)
• FirstClass krev mykje museklikking med mange åpne vindu.
• Dei som har vent seg til FirstClass likar spesielt godt enkel opplasting av dokument i arbeidsbok og chat.
• Å ha læringsmiljøet delt på Internett og eit intranett gir litt for mange arenaer å forholde seg til, - det er tungvint å hoppe frå nettlesar til FirstClass og omvendt.

Ressurssidene

Gjennom prosjektmidlar frå LS har vi utvikla ressurssidene vidare parallelt på bokmål og nynorsk. Vi har konsentrert oss om norsk. Vi har gjort avtale med norskseksjonen på Høgskulen i Volda om eit samarbeid om vidare utvikling og praksis for studentar.

Vi har trappa ned samarbeid med og bruk av vertsklasser i fleire klassetrinn. No er det 3. 4. 5. og 9. klasse som nyttar aktivt vertsklassene. 2. 6. 7. 8. og 10. klasse nyttar vertsklasser lite eller ikkje i det heile.

Foreldrevurderinga

Vi har i hausthalvåret gjennomført foreldrekonferansar i alle klassene. Dette har skjedd gjennom e-post og spørjeskjema på nettet. Ikkje alle foreldre har svara. Sjå vedlegg.

Nedleggingstrua utkantskular og elevar som er tekne inn på særskilt grunnlag

3 utkantskular har tatt del i fjernundervisninga vår dette skuleåret. Skjervøy i Osen kommune, Sørburøy i Hitra kommune og Valsvik skule i Vik i Sogn. Desse har så langt gitt gode tilbakemeldingar. Vi vil motta eigne rapportar frå desse til våren 2001. Samarbeidet med Globalskolen har vore med å hindre nedlegging av skulane inneverande skuleår.

Lærebokuavhengig nettundervisning

Nettbaserte ressursar vert brukt stadig meir av fleire av nettlærarane, men lærebøker er framleis nødvendig, særleg i dei yngste klassetrinna. Nettlærar Julie Bjørnstad held fram med lærebokuavhengig fjernundervisning. Dette er arbeidskrevande, men arbeidsmåten ligg tett opp til måla i L-97. Tilbakemelding frå elevar og foreldre er positiv. Vi bør utvikle betre kontrollrutinar for kvalitetssikring av lærestoffet.

I hausthalvåret 2001 har Globalskolen vore presentert i heilside i Aftenposten, og i fleire lokalaviser knytt opp til vertsklassene.

Revisorgodkjend rekneskapsrapport for hausthalvåret 2001 vert utarbeidd og sendt til KUF seinast 1. mars. Tildelinga på 2 000 000,- har gjort budsjettplanlegging for vårhalvåret enklare.

Våren 2001 held vi fram med skulepengesatsar som hausten 2001. Halvårssats: norsk 1000,- . samfunnsfag. 500,-. KRL: 500,-. matematikk: 1000,- .

Frå hausten 2002 må ei ny driftsordning på plass, slik KUF påpeika allereie hausten 1999. Vi trur at godkjenning som privatskule vil forenkle alt arbeidet kring skulepengar og finansiering.

Vi søkte om prosjektmidlar til utviklingsarbeid frå Læringssenteret og andre instansar. Men vi har ikkje fått tildelt nye midlar hausten 2001.

Rapportar frå nettlærarane

Nettærarane har skrive halvårsrapportar, dei ligg på passordverna område. Interesserte samarbeidspartar kan be om kopi av desse rapportane.

Skuleåret 2002/2003

Vi må planlegge ut frå tre eventualitetar:

1. Dersom vi vert godkjende som privatskule vil vi bygge ut tilbod i alle fag frå 1. til 10. klasse så snart som vi har elevgrunnlag for det.
2. Dersom KUF vedtek retningslinjer for drift av nettbasert grunnskuleundervisning, ynskjer vi å prioritere 2. til 10. klasse med faga norsk, samfunnsfag og KRL, og gjere forsøk med andre fag så langt vi får prosjektmidlar.
3. Dersom vi må halde fram som forsøksprosjekt må vi prioritere 2. til 10. klasse med faga norsk, samfunnsfag og KRL, og gjere forsøk med andre fag så langt vi får prosjektmidlar.

• Vi reknar med eit elevtal på ca 300 elevar.
• Pr dato har alle nettlærarane tilbode seg å halde fram neste skuleår, dei fleste ynskjer å ha fleire elevar.
• Vi utvidar gjerne til fleire målgrupper i Norge, til dømes elevar som har heimeundervisning.

Konklusjon

Utvidinga av Globalskolen til 9 klassetrinn, frå 120 til 180 nettelevar har vore vellykka.

Pedagogisk: Den fleksible prosjektorienterte arbeidsmåten har utvikla seg vidare i dei fleste klassene. Vår pedagigiske vinkling med fokus på den aktive samarbeidande elev er fullt mogleg å få til på nettet. Slik ligg Globalskolen tett opp til måla i læreplanane (L-97). Vi ser at nettbasert fjernundervisning kan fungere bra også i 2. klasse når foreldra samarbeider tett med nettlærar kvar veke.
På det jamne ligg faglig nivå hos nettelevane helst over nivået i vertsklassene.

Teknisk: Vi har gjort verdifulle erfaringar med eit nytt dataverkty, FirstClass. Vi har ikkje teke endeleg avgjerd om kva verktøy som bør brukast skuleåret 2002/2003.

Administrativt: Finansieringsmodell og drift: Både foreldre, nettlærarar og utvikling av nettbasert grunnskuleundervisning generelt lid under mangel på departementale retningslinjer. Det har gått over 2 år sidan KUF gikk inn for ein formalisert driftsavtale utan prosjektmidlar. Dette har ikkje gitt resultat. Vi har difor valt å sende søknad om godkjenning som privatskule.

Denne halvårsrapporten vert formidla til:

• KUF, grunnskuleavdelinga. Får også vedlagt rapportar frå nettlærarane.
• Statens utdanningskontor i Oslo og Akershus
• Statens utdanningskontor i Møre og Romsdal
• Nettlærarane
• Høgskulen i Volda
• Læringssenteret
• Utdanningsforbundet

Les gjerne vedlegget på nettet:
Statistikk frå foreldrevurdering av læringsarenaene i Globalskolen hausten 2001.
http://www.norsknettskole.no/globalskolen/informasjon/haust2001rappvedlegg.htm

Dato: 1. februar 2002